Хрватскиот фудбалер Иван Перишиќ и официјално го напушти Интер и кариерата ќе ја продолжи во тимот на Тотенхем кој денеска го претстави како нов играч.
Тренерот на „петлите“, Антонио Конте, го спомена Перишиќ како приоритет во овој преоден рок, а најдобар показател за тоа колку клубот го почитува и колку сака да му излезе во пресрет е фактот веднаш го „средија“ договорот зановиот главен играч со кој ќе ја засили левата страна.
Перишиќ потпиша двегодишен договор со Тотенхем, а од Интер претходно изјавија дека ја разбираат неговата желба да се проба во англискиот премиерлигаш и му се заблагодарија за сè што направи за нивниот клуб. Перишиќ со години го посакуваат многу клубови од Англија, а тој самиот изјави дека сака да игра во „најдобрата лига на светот“.
Сега, по седум години, како слободен играч, го напушти Интер, со кој го освои Купот и Суперкупот на Италија.
За Интер 33-годишниот Перишиќ одигра вкупно 254 натпревари на кои постигна 55 голови и 49 асистенции.
Перишиќ кариерата ја започна во француски Сошо каде настапуваше од 2007 до 2009 година, по што играше за Клуб Бриж, Борусија Дортмунд, Волфсбург, Баерн и на крајот Интер. За хрватската репрезентација дебитираше во 2011 година и со Ватрени стана светски вицешампион во 2018 година на Светското првенство во Русија.
