Граѓаните на Бугарија вчера излегоа на петтите парламентарни избори за само две години, кои беа организирани откако партиите и во последниот постизборен период не постигнаа договор за формирање стабилна владејачка коалиција.
Но, се чини дека и по петтите избори ситуацијата нема да биде многу подобра со оглед на тоа што според последните податоци на Централната изборна комисија на Бугарија, ниту една партија нема комотна позиција која би ѝ овозможила да формира влада.
Имено, по 81 отсто од обработените гласови, ЦИК соопшти дека најголем број гласови освоила коалицијата ГЕРБ-СДС која добила поддршка од 26,7 отсто од гласовите. Оваа коалиција ја предводи поранешниот премиер на државата Бојко Борисов.
Реформистичкиот блок составен од партиите Продолжи со промените, а Демократска Бугарија е втора со 24,7 отсто од гласовите. Исто така, она што треба да се истакне е фактот дека екстремно десничарската партија Вазраздана моментално е на третата позиција по број на гласови, а според податоците на ЦИК ја уживаат поддршката од 14,6 отсто од населението.
По овие партии следат Движењето за права и слободи со 12,7 отсто од гласовите, Социјалистичката партија на Бугарија со девет отсто од гласовите, додека партијата на бугарската ТВ ѕвезда Слави Трифонов (Има Таков Народ) освоила 4,3 отсто од гласовите.
За актуелните изборни резултати се огласи и претседателот на десничарската партија Вазраздана Костадин Костадинов кој рече дека без нив не може да се формира влада.
„Нема начин да се има влада без нашата партија. Ако првите две партии формираат влада, таа нема да биде стабилна. Подготвени сме да одиме на нови избори доколку нема договор за формирање влада“, рече Костадинов.
