Предводникот на „Росонерите“ признава дека неговиот тим направил премногу неизнудени грешки, но се надева дека синоќешниот дебакл ќе му помогне на тимот да созрее и да стане уште поодлучен.
На Милан ми недостасуваа дури 8 играчи поради повреди (Калабрија, Флоренци, Ернандес, Ибрахимовиќ, Кјер, Мењан, Месиас и Салемакерс) и поради тоа Стефано Пиоли мораше да импровизира ставајќи некои играчи вон нивните природни позиции. Тоа резултираше со некои банални грешки и пораз од 3:0 на „Стемфорд Бриџ“.
„Требаше да одиграме подобро, нема збор тука. Не почнавме лошо, но потоа загубивме форма и правевме грешки дури и без да ни играат пресинг, па кога ќе направиш толку многу грешки против противник со ваков квалитет, работите се комплицираат“, рече Пиоли говорејќи за Sky Sport Italia.
„Отсуствата се ирелевантни. Мислев дека тимот е подготвен да го одигра овој натпрервар и бев свесен за опасностите, но и покрај тоа ние само ја губевме топката или правевме грешки во додавањата. Така на Челси му овозможивме преголем простор“, додаде.
„Поразот мора да ни помогне да созрееме, да најдеме уште повеќе одлучност и концентрација. Тежок пораз е, тоа е сигурно, но имаме шанса во сабота да докажеме каков тим сме“, алудираше на наредниот натпревар и тоа големото дерби против Јувентус во Милано.
„Нормално, тимот е разочаран и лут што не одигра најдобро што може, но тоа ќе нѐ мотивира за идните настапи“, заврши италијанскиот стратег кој лани на Милан му го донесе првото Скудето после 11 години.