Доделувањето на Златната топка од следната сезона ќе претрпи неколку значајни промени.
Престижниот трофеј, контроверзно доделен на Лионел Меси минатата година, ќе се доделува врз основа на перформансите во текот на целата сезона, а не според календарската година како што беше случај претходно. Колективниот аспект и освоените трофеи ќе останат во втор план, во корист на „индивидуалните настапи“.
Оваа информација ја објави магазинот France Football кој ја доделува наградата, а трофејот сега ќе биде ускладен со целата сезона која трае од август до јули, а жирито планира да има построги стандарди на оценување, „прочистена“ претселекција и појасни критериуми за доделување.
Следната свеченост за доделување на наградите ќе се одржи во септември или октомври 2022 година и ќе ја покрие сезоната започната една година порано, особено земајќи ги предвид Лигата на шампионите за мажи (финале на 28 мај) и ЕУРО за жени (6-31 јули).
Оваа реформа следи затоа што календарот за следната сезона ќе се преврти наопаку со организацијата на Светското првенство во 2022 година во Катар во ноември и декември, а не во текот на летото.
France Football направи и други значајни промени, како што е интеграцијата на поранешната ѕвезда Дидје Дрогба во комисијата одговорна за потесниот избор на номинирани.
Дополнително, бројот на гласачи ќе биде затегнат, но сепак ќе биде составен од новинари, со по еден гласач по нација, но жирито сега ќе вклучува само 100 гласачи за машката Златна топка (во споредба со претходните 170), што одговара на првите 100 нации пласирани на ранг-листата на ФИФА и 50 за Златната топка за жени на ист начин.
Конечно, ќе се разјаснат критериумите за доделување: колективниот аспект и освоените трофеи ќе го заземат второто место, во корист на „индивидуалниот настап“ и „решавачкиот и импресивен карактер на натпреварувањето“.
„Се работи за избегнување на нејаснотии, јасно и доследно. Златната топка е индивидуална награда, заснована на индивидуалните перформанси“, тврди главниот уредник на France Football, Паскал Фере.
За потсетување, Аргентинецот Лионел Меси минатата година ја освои седмата Златна топка во кариерата, а ја освои пред Полјакот Роберт Левандовски, за кој многумина мислеа дека повеќе го заслужи ова признание. На пример, македонскиот новинар кој гласаше не му даде ниту еден бод на Левандовски.
Меси претходно ја освои Златната топка во 2009, 2010, 2011, 2012, 2015 и 2019 година. Така Аргентинецот остана играч со најмногу златни топки (7), Кристијано Роналдо има 5, а Платини, Кројф и Ван Бастен имаат по 3.