АД за изградба и стопанисување со станбен и деловен простор соопшти дека почнати се работите на Националната арена „Тодор Проески“ со цел ноемврискиот дуел со Англија да се игра на квалитетна подлога.
Откако паразит беше обвинет дека ја уништил тревата на која цел свет виде како играа Македонија и Италија во квалкификацџиите за ЕУРО 2024, конечно работите мрднаа од место и почнаа активности за поставување на нова трева.
„Отпочнуваме со активности на Националната арена 'Тодор Проески' во насока на целосна ревитализација на тревната површина и нејзините пропратни елементи. АД за изградба и стопанисување со станбен простор и со деловен простор од значење за Републиката во соработка со ФФМ отпочнува процес на целосно менување на тревната површина коешто последен пат е изведено во 2012 година. Проектот е донација од ФФМ преку УЕФА и се очекува да биде готов пред националниот натпревар со Англија на којшто ќе можеме да се пофалиме со нова, најсовремена тревна површина согласно највисоките стандарди на меѓународните фудбалски институции“, соопшти АДИССДП.
Известија и дека пред поставување на тревната површина активно се работи на надградба на системот за наводнување на тревата, на начин којшто ќе биде најадекватен за новото игралиште.
Велат дека вредноста на инвестицијата и на донацијата ќе биде дополнително истакната кога целиот проект ќе се презентира како реализиран.
„Новите услови на Националната арена ќе ги подобрат условите за работа на националниот и клупскиот фудбал, и генерално се во насока на успешно развивање на спортот во Македонија“, додаваат.
Од ФФМ претходно соопштија дека новата тревна подлога ќе биде хибридна, односно комбинација од 70% вештачка и 30% природна трева. Беше најавено и дека средствата обезбедени за оваа реконструкција се 200 илјади евра.
До натпреварот со Англија стадионот ќе биде затворен, а клубовите Работнички и Вардар ќе играат на други терени, најверојатно на „Борис Трајковски“.
Репрезентацијата на Македонија сега во октомври во квалификациите игра на гости против Украина (на неутрален терен во Прага, Чешка), а потоа Ерменија на пријателска ќе ја нагости на „Благој Истатов“ стадионот во Струмица. Со Англија дома играме тек на 20 ноември, натпревар со кој ќе ги затвориме квалификациите. Дотогаш теренот треба да биде целосно реконструиран и подготвен за игра.
