Противници на Владимир Путин и руската инвазија покренаа петиција во која бараат Швајцарија да ја протера Алина Кабаева, наводната љубовница на рускиот претседател.
Според претходните пишувања на светските медиуми, Алина наводно со децата се крие во високо обезбедена луксузна вила во Швајцарија. Лути Украинци, Белоруси и Руси испратија порака до швајцарските власти во кои бараат Алина да биде протерана од таа земја.
„Зошто ги криете помагачите на режимот на Путин?“, гласи петицијата.
„Ние, граѓаните на Русија, Белорусија и Украина, земја која моментално е во големо страдање, се обединуваме во обраќањето до швајцарските власти. Јавноста дозна дека Алина Кабаева избега од санкциите во вашата земја. Таа е љубовница на диктатор и воен злосторник кој ја нападна Украина“, стои во петицијата, досега потпишана од над 55.000 луѓе. „Време е Ева Браун да му се врати на нејзиниот лидер“, се додава
Во петицијата исто така стои:
„Алина не е само жена чие име е извалкано поради асоцијацијата со рускиот диктатор, таа е еден од иницијаторите на рускиот закон кој ја спречи можноста илјадници руски сирачиња да бидат посвоени во странство. Вие сега дозволувате таа и нејзините деца да се кријат во вашата земја“.
Иницијаторите на петицијата додаваат дека ќе се погрижат се да се дознае ако Швајцарија дозволи Алина да добие нивно државјанство.
Засега нема проверени докази кои укажуваат дека Алина навистина се наоѓа во Швајцарија. Изворот кој претходно месецов ја започна оваа приказна остана анонимен.