Лансирањето на мисијата Artemis 1 на НАСА, која беше одложена поради ураганот Јан, ќе се случи во средината на ноември, доколку сè оди според планот.
НАСА првично планираше да ја лансира ракетата SLS како дел од мисијата Artemis 1 на 29 август, но поради проблеми со истекување на гориво, двапати мораше да го одложи тој датум. Откако инженерите ги средија проблемите, агенцијата имаше шанса да го направи тоа на 23 и 27 септември, но поради ураганот што се приближуваше, беше принудена да ја стави ракетата на безбедно, за силното невреме да не ја оштети.
Невремето го погоди Вселенскиот центар Кенеди на 29 септември, а според објавените информации, освен помал упад на вода во повеќе објекти, ракетата SLS и капсулата Orion не претрпеле никаква штета.
Ураганот, сепак, влијаеше на времето на мисијата Artemis 1 - НАСА сега размислува за полетување помеѓу 12 и 27 ноември, иако сè уште не утврдиле точен датум во тој период.
„Фокусирањето на напорите за лансирање во ноември им дава време на вработените во ВЦ Кенеди да ги задоволат потребите на нивните семејства и домови по невремето, како и време за тимовите да извршат дополнителни проверки пред да се вратат на лансирната рампа“, изјавија претставници на НАСА.
Artemis 1 е првата мисија во рамките на програмата Artemis, која има за цел да воспостави постојано човечко присуство на и околу Месечината до крајот на деценијата.
Ако се оди според планот, Artemis 1 ќе испрати беспилотна капсула Orion на долгото патување до орбитата на Месечината и назад. Artemis 2 ќе испрати астронаути во орбитата на Месечината во 2024 година, а Artemis 3 ќе слета екипаж во близина на јужниот пол на Месечината во 2025 или 2026 година.
