Од пред неколку дена на Netflix е достапна нова серија насловена „The Haunting of Hill House“ што многумина веќе ја нарекуваат најстрашната и најморничавата серија на годината.
Серијата е базирана на истоимениот класик на Ширли Џексон од 1953 година што подоцна послужи како основа за филмот „The Haunting“. Сценариото и режијата се на Мајк Фланеган, познат по хорорите „Hush“ и „Ouija: Origin of Evil“.
Приказната следи пет браќа и сестри кои пораснале во домот што ќе стане најпознатата проколната куќа во земјата.
Сега се пораснати и трагедијата ги присилува да се вратат и да се соочат со духовите од минатото, од кои дел уште им ги окупираат мислите, а други само ги следат низ сенките во Hill House.
Трагичното собирање на семејството е појдовна точка за серијата од 10 епизоди што ја открива дисфункционалноста на сега веќе возрасните браќа и сестри кои ја напуштиле страшната куќа откако мајка им починала во почетокот на 90-тите.
Серијата ги обработува трауматичните случувања и психичките последици од нив во денешно време што се манифестираат преку ментални болести, тајни, лаги и неверства.
Серијата засега има оцена 9,1 на IMDb, сличен рејтинг има на Rotten Tomatoes, а љубителите на овој жанр веќе ја нарекуваат „годинашната Stranger Things“.