Во англиската Премиер лига во последниот круг од тестирањата направени се 1.195 тестови за COVID-19.
Тестирањата беа направени во четвртокот и петокот и резултатите покажаа дека нема позитивни на новиот коронавирус.
Во претходниот круг имаше еден позитивен, а досега се направени вкупно 6.724 теста со 13 позитивни резултати.
Премиер лигата е суспендирана од 13 март, а се очекува да се обнови на 17 јуни со натпреварот меѓу Астон Вила и Шефилд Јунајтед во 18 часот, додека дуелот Манчестер Јунајтед-Арсенал е на распоредот од 20 часот и 15 минути.
До крајот на сезоната остана да се доиграат 92 натпревари, а Ливерпул е на врвот на табелата со 25 бодови повеќе од второпласираниот Манчестер Сити.
Се очекува шефовите на Премиер лигата да бидат овластени да изрекуваат огромни казни за сите играчи кои си дозволуваат да ги прекршат безбедносните мерки.
Официјалните претставници на Лигата сакаат да спречат какви било опасности што би можеле да спречат продолжување на првенството. Според The Sun, казните за играчите кои ги кршат мерките за изолација ќе бидат во размер до 200.000 фунти.
Според информациите, повторените прекршувања би довеле до парична казна од двојно поголема сума на пари, додека серија прекршувања во еден клуб можат да бидат санкционирани дури и со одземање на поени.
Овие драстични мерки ќе бидат преземени откако голем број sвезди во Премиер лигата се фатени „на дело“ во последните неколку недели.