Научниците за прв пат успеаја да снимат како јато орки познати како „китови убијци“ ловат и убиваат возрасен син кит.
„Морска потера“ беше снимен во март 2019 година во близина на Западна Австралија, но штотуку беше објавен од научното списание Marine Mammal Science. Оттогаш, уште два слични напади на младенчиња на сини китови се регистрирани на истата локација, заливот Бремер, еден во истата година, а другиот во 2021 година.
Иако има извештаи за спорадични напади од орки кои сериозно повредиле сини китови, засега нема потврда дека убиле син кит, возрасен или младенче. Сепак, научниците го забележале и го снимиле нападот во март 2019 година, кога јато од 12 до 14 орки нападнале возрасен син кит кој имал длабока рана од каснувањето до коската на грбната перка.
Орките продолжиле да го напаѓаат пленот 20 минути додека синиот кит удрил и замавнал со опашката обидувајќи се да се одбрани. Меѓутоа, орките го убиле китот за помалку од еден час, а им се придружиле и други од јатото за да се хранат. Ги имало околу 50.
Вториот напад се случил 16 дена подоцна, а научниците забележале 26 орки. Третиот напад траел речиси три часа, а во него учествувале меѓу 50 и 75 китови убијци. Во сите три напади учествувале околу 16 исти орки.
Возрасните женки најчесто ги започнуваат нападите бидејќи мораат да ги хранат младите.
Орките се најголемите членови на семејството делфини, а прекарот „китови убијци“ го добиле од старите морнари кои ги гледале како ловат поголеми видови китови. Сините китови се најголемите животни на Земјата и може да тежат до 33 тони.
