Менаџерот на Златан Ибрахимовиќ, Мино Рајола, изјави дека Ибра е во одлична физичка состојба и покрај тоа што има 39 години и дека прави склекови додека тој седи на него.
„Златан е во одлична физичка состојба и понекогаш прави склекови додека седам на него, а јас тежам многу. Тој би можел да игра до 50-тата година, но сака да игра само во силни лиги“, изјави Мино Рајола за холандскиот дневен весник de Volkskrant.
Иако има 39 години, Златан Ибрахимовиќ игра одлично во дресот на Милан, кој по осум кола го држи првото место во италијанскиот шампионат, а шведскиот голгетер е најдобар стрелец во лигата со 10 погодоци. Тој постигна два гола во неделата во победата на „Росонерите“ над Наполи со 3:1, но се здоби со повреда на мускулот на левиот бут и ќе паузира десет дена.
„Ибрахимовиќ ги поставува стандардите од кои клубовите профитираат со години. Каде беше ПСЖ пред него, каде беше Милан? Тој го воскресна Милан од мртвите и сега е 90 проценти од тој тим“, рече Рајола.
По Пари Сен-Жeрмен и Манчестер Јунајтед, Ибрахимовиќ помина скоро две години во американската МЛС лига играјќи за ЛА Галакси, пред да се врати во Милан на крајот на декември 2019 година, чиј дрес претходно го носеше две сезони (2010-2012).
„Тој отиде во ЛА Галакси затоа што сакаше да живее во Лос Анџелес со своето семејство. Но, играчки му беше катастрофа. Златан секогаш сака да победи, без разлика дали се работи за фудбал или видеоигри, а неговите соиграчи во ЛА Галакси ја немаа таа желба за победа“, додаде неговиот менаџер.
