Шпанскиот новинар Салвадор Сострес се извини што го споредил фудбалерот на Барселона Ансу Фати со илегални улични продавачи.
Во извештајот за шпанскиот весник ABC, Сострес, меѓу другото, напишал дека Фати потсетува на „црн уличен продавач“ кој „одеднаш почнува да бега“ кога ќе се појави полицијата.
Мигранти со темна кожа кои илегално продаваат разни работи на улиците и во парковите се честа појава во Шпанија.
Фати завчера постигна гол и асистираше за победа на Барселона над Ференцварош во Лигата на шампиони.
Во негова одбрана прв застана неговиот соиграч Антоан Гризман, кој рече дека Фати е „одлично момче кое заслужува почит како и секое човечко суштество“ и додаде „НЕ за расизмот и грубоста“.
Весникот ABC издаде соопштение во кое се наведува дека Сострес се обидел да ја „пофали убавината на потезите на Фати“ и „длабоко се извини за недоразбирањето“.
Истиот ден, ABC ја изгуби тужбата што против весникот ја имаше поднесено Фондацијата Лионел Меси. Весникот објави дека фондацијата манипулирала со своите сметки, поради што ABC ќе треба да плати 7.142 евра, кои, како што беше најавено, ќе бидат донирани на локална болница.
