Од лансирањето пред четири години, минијатурниот компјутер Raspberry Pi претрпе бројни ревизии, како и хардверски додатоци за него, а сега ќе добие и обична и инфрацрвена камера базирана на сензорот IMX219 на Sony.
Еден од првите додатоци за Raspberry Pi остана непроменет цело време од неговото лансирање, а тоа е OmniVision OV5647 модулот за камера со 5 мегапиксели. Главата причина беше во потегот на Raspberry Pi фондацијата која во тоа време набави огромна количина од овој сензор за да ја задржи цената ниска, како и да има секогаш доволни количини на камери „на лагер", но се чини дека на овие залихи им дојде крајот.
IMX219 сензорот на Sony има можност за снимање на фотографии со резолуција од 3.280 х 2464 пиксели и 1080р HD видео со 30 fps, импресивен квалитет на фотографиите, приказот на бои и перформанси дури и при слабо осветлување.
Како и секогаш до сега во случајот со Raspberry Pi компјутерите и опремата за нив, новиот модел на хардвер ќе се продава по стара цена од 25 долари.