Навивачите кои ги дебело платија за влезниците за финалето на Европското првенство ги обвинија редарите на стадионот „Вембли“ дека со поткуп пуштале на трибините луѓе кои немале билети за натпреварот.
Очевидци за лондонски The Times изјавија дека некои од нив се плашеле да им се спротистават на навивачите кои на тој начин седнале на нивните места на „Вембли“ и дека целата ситуација наликувала на целосен хаос што резултираше со срам за целата нација.
„Бев во целосен шок, никогаш не сум видела такво нешто. Еден редар имаше полни џебови со пари од поткуп, му паѓаа од џебовите. Пушташе луѓе без билет да влезат на стадионот. Ги предупредив другите редари што се случува. Еден од нив му пријде на еден навивач кој влезе со поткуп на стадионот, а овој му се закани со нож“, изјави една навивачка.
На натпреварот присутен беше и телевизискиот презентер Метју Стадлен, кој изјави дека видел луѓе како подмитуваат редари за да влезат на трибините.
„Безбедноста беше на срамно ниво. Не можев да верувам дека нема полиција воопшто, дојдоа дури откако ситуацијата беше целосно надвор од контрола“, рече Стадлен и додаде дека хулиганите кои тепале Италијанци биле добро познати и претходно казнувани.
Лондонската полиција соопшти дека уапсила 86 прекршувачи на редот пред, за време и по финалето, од кои 53 на стадионот, а во немирите биле повредени 19 полицајци.
Британските медиуми пишуваат дека ова е огромна шлаканица за земјата што ќе се кандидира за домаќин на Светското првенство во 2030 година.
