Renault во Париз претстави спортски автомобил со електричен погон и технологија за автономно возење. Со тоа оваа компанија се приклучи на трендот на развој на електрични автомобили со врвни перформанси.
Renault Trezor е футуристички концепт кој е изработен од јаглеродни влакна, а има несекојдневно решение за влез во автомобилот.
Место класични врати има систем кој го отвора целиот горен панел од автомобилот. Иако решението е интересно, сепак е непрактично бидејќи за влез во автомобилот мора да се прескокне страната на автомобилот.
За компанијата сепак се поважни технологиите што ги има во срцето на автомобилот. Trezor користи електромотор преземен од болидот што се натпреварува во Formula E натпреварите. Агрегатот развива 350 коњски сили, а благодарение на масата од 1.600 килограми, забрзува од нула до 100 километри на час за помалку од 4 секунди.
Вториот важен систем е оној за автономно управување без мешање на возачот.
Renault како и останатите компании, планира до 2020 година да понуди сериски модел со опција за целосно автономно возење.
