Еден од последните рестомодни проекти базирани на Porsche 911 од серијата 964 е потпишан од инженерот Ален Бишофбергер од американската компанија Fogline Industries.
На постојано растечката листа на компании кои ги обновуваат и модифицираат бесмртните „елфери“ на Porsche од времето кога се напојуваа со боксер мотори со воздушно ладење (вклучувајќи ја и серијата 993), се најде и американската компанија Fogline Industries, која претстави рестомод проект базиран на Porsche 911 од серијата 964.
Поскап од слични креации од компаниите Singer, Theon Design, Paul Stephens, Gunter Werks... рестомодот 911 потпишан од Ален Бишофбергер во име на Fogline се придвижува од 4-литарски 6-цилиндричен атмосферски мотор со воздушно ладење (430 КС при 7.800 вртежи во минута), а новоразвиениот издувен систем од титаниум го помага извонредниот звучен пејзаж. Моќта се пренесува на задната оска преку рачен менувач со 6 брзини.
Масата од само 1.220 килограми се должи на обилната употреба на јаглерод, од кој се направени речиси сите делови од каросеријата, а купето е поставено на ултралесни бандажи од 18 инчи (Augment Wheels) со гуми широки 265 мм напред и 305 мм одзади. Зад сопирачките што ги нуди реномираната италијанска компанија Brembo се крие мулти-прилагодлива суспензија.
На специјалисти од компанијата DJ Interiors Custom им беше доверена задачата да го украсат ентериерот обложен со кожа, во кој доминира сината боја надополнета со детали во златна боја. Тука се и седиштата Recaro, воланот Sparco со три краци и редизајнирани аналогни инструменти, а во духот на модерното време има и помал дисплеј на мултимедијалниот систем кој е компатибилен со апликациите Android Auto и Apple CarPlay.
На купувачите на вакви автомобили веројатно нема да им пречи информацијата дека Fogline Industries бара 1,14 милиони евра во замена за својата рестомод приказна.
