Конор Мекгрегор и Флојд Мејведер продолжуваат со препукувања преку социјалните мрежи, а нивната комуникација сѐ повеќе изгледа како да најавува реванш помеѓу двајцата, но овојпат во различна околина и под различни услови.
Ако прашавте било кого по бокс мечот помеѓу Мекгрегор и Мејведер дали ќе има реванш, веројатно сите би ви одговориле дека нема шанси да се случи такво нешто, што поради староста на Мејведер, тоа и поради парите кои беа во игра во тој момент.
Сега, неколку месеци по оригиналната борба на двајцата, тие и понатаму продолжуваат да се „провоцираат“ преку нивните профили на социјални мрежи, а тоа многу лесно може да биде протолкувано како најава за реванш помеѓу двајцата.
Мејведер неодамна објави фотографија и видео како влегува во кафез сличен на оној од УФЦ, а потоа боксерот продолжи да го провоцира популарниот ирски борец. Вчера тој објави фотошопирана фотографија како го удира МекГрегор со лакт во ринг многу сличен на оној од УФЦ натпреварувањето.
Конор Мекгрегор сепак, не остана без одговор. Веднаш на неговиот Twitter профил објави фотографија од неговата борба со Нејт Дијаз, проследена со опис „Вистински лакт во вистинска борба“.
Иако засега е малку веројатно дека реванш помеѓу Флојд Мејведер и Конор Мекгрегор ќе се случи, тешко е да се отпише можноста поради големите пари кои се во игра доколку се случи оваа борба. Организаторите на УФЦ борби многу долго чекаат ваков спектакл и тие форсираат оваа борба да се случи поради големиот наплив на пари кој ќе го има натпреварувањето.