Кристијано Роналдо се најде на удар на јавноста по средбата меѓу неговиот Ал Наср и Ал Хилал кога направи срамен гест кон навивачите на противничкиот тим.
Ситуацијата се вжешти, па отиде дури дотаму што некои јавни личности и навивачи бараат негова депортација.
Навивачите на екипите против кои игра Роналдо со години го провоцираа Португалецот скандирајќи „Меси, Меси“ од трибините, а тој до вчера воопшто не реагираше на тоа.
Сепак, откако неговиот Ал Наср беше поразен на гости со 2:0 и се оддалечи од титулата шампион на Саудиска Арабија, Роналдо беше видно нервозен, па падна на провокациите од трибините.
При напуштањето на теренот, Роналдо одговори со фаќање за меѓуножјето на извиците „Меси, Меси“ од трибините, што беше осудено на социјалните мрежи.
Нуф бин Ахмед, еминентна адвокатка со светско реноме, професорка на Универзитетот во Женева, советник за меѓународни спорови и арбитар во служба на ОН, објави на Twitter дека ќе поднесе кривична пријава до Јавното обвинителство на Саудиска Арабија, поточно барање за апсење и депортирање на Кристијано Роналдо.
„Неговото фаќање за гениталиите е кривично дело ‘непристојно однесување во јавност’, кое доколку го изврши странски државјанин, повлекува апсење и депортација“, напиша таа и додаде.
„Воопшто не следам спортови. Дури и ако навивачите на Ал Хилал го испровоцирале Кристијано, тој не требаше така да реагира. Неговата постапка е кривично дело“.
Таа се осврна и на потегот со кој Роналдо собори противник, кога го „задави“ со ММА потег.
„Тоа е напад на противнички играч кој нема никакво оправдување и нема врска со фудбалот. Кристијано Роналдо направи толку агресивен чин што исто така е казниво.“
Новинарот Озман Абу Бакр го окарактеризира потегот на Роналдо како неморален и непристоен и побара од Националната фудбалска лига на Саудиска Арабија автоматски да го раскине договорот.
Секако, тешко е да се поверува дека Роналдо ќе биде санкциониран, имајќи предвид дека е најголема ѕвезда во Саудиска Арабија, но нема сомнеж дека со овој потег си го наруши угледот.
По поразот во дербито, Ал Наср остана на 53 бода, три помалку од лидерот Ал Итихад, кој има натпревар помалку. Во саудискиот шампионат се играат 30 кола и ќе биде вистинско чудо доколку Ал Итихад не се закити со титулата шампион.
