Напаѓачот на Манчестер Јунајтед, Кристијано Роналдо одговори на сè почестите прозивки од страна на противничките навивачи.
Речиси и да нема ден да не се пишува за неговото заминување од Манчестер Јунајтед, по само една година престој во клубот каде што се прослави на почетокот на кариерата.
Само еден ден откако навивачите на Атлетико Мадрид, со истакнување на транспарент на пријателскиот натпревар со Нумансија, му порачаа дека не е добредојден, реагираше Роналдо.
Под фотографијата на која се гледа транспарент со порака „CR7 не е добредојден“, Роналдо објави серија емотикони.
Сепак, тоа не е сè. Роналдо очигледно не е задоволен од тоа како медиумите известуваат за него ова лето.
На почетокот на месецот беше објавено дека тој на раководството на клубот му кажал дека има намера да го напушти клубот бидејќи сака да продолжи да се натпреварува во Лигата на шампионите.
Сепак, неговиот агент Жорже Мендеш досега не успеа да му најде клуб, а Јунајтед остана на ставот дека тој не е на продажба.
На крајот на краиштата, Португалецот се огласи на Instagram со прилично остра порака до медиумите.
„Невозможно е да не се зборува за мене барем еден ден. Во спротивно медиумите не би заработувале. Знаете дека ако не лажете, не можете да го привлечете вниманието на луѓето. Само продолжете, можеби еден ден ќе објавите некоја точна вест“, изјави Роналдо.
Последните вести велат дека Мендеш го нуди на Спортинг од Лисабон, каде Роналдо ја започна кариерата, како и во Наполи.