По отказот на францускиот стратег Руди Гарсија, на клупата на саудиски Ал Наср седна поранешниот помлад тренер Динко Јеличиќ. 49-годишниот Хрват на тој начин доби можност да биде тренер на Кристијано Роналдо, но најверојатно ќе остане на позицијата само до крајот на сезоната.
Како привремено решение на клупата на првиот тим беше замислен Јеличиќ, кој претходно ги водеше Кустошија, Рудеш, Радник од Сесвет и хрватската репрезентација до 19 години. Управата на клубот е во потрага по нов тренер, а во таа одлука учествува и самиот Роналдо.
Во разговор со претседателот на клубот Мусли Ал-Моамар и неговиот советник, тој предложи клубот да им даде предност на три лица: Жозе Мурињо, Зинедин Зидан и Хорхе Жесус. Роналдо успешно соработуваше со Зидан и Мурињо во Реал Мадрид.
Со Мурињо ја прекина доминацијата на Барселона на Гвардиола во првенството, а со Зидан освои три ЛШ во низа.
Роналдо сè уште немал можност да работи со сонародникот Хорхе Жесус. Жесус моментално е во Фенербахче со кого има договор до крајот на сезоната. Претходно успешно ја тренираше Бенфика, а со бразилскиот Фламенго го освои Копа Либертадорес и шампионската титула.
Зидан е надвор од терените откако се повлече од клупата на Реал во летото 2021 година, а доведувањето на Мурињо може да биде најтешката задача за Саудијците. Португалецот лани со Рома ја освои Конференциската лига, а оваа сезона преку Серија А се бори за трофејот во Лига Европа и пласман во Лигата на шампионите.
