Ал Наср за прв пат во историјата стигна до финалето на Арапскиот куп на шампиони, а прославата на Роналдо по голот што ги однесе таму предизвика многу полемики во муслиманската Саудиска Арабија.
Ал Наср во полуфиналето го победи ирачкиот Ал-Шорта со 1:0, а Кристијано Роналдо го постигна единствениот гол на натпреварот и тоа од пенал во 75. минута.
Португалецот го прослави голот со својот заштитен знак „Сиуууу!“, но пред да го направи својот познат спин во воздух се прекрсти, што вообичаено не го прави.
Неговиот потег предизвика бројни реакции во Саудиска Арабија, земја во која исламот е доминантна религија. Иако услловно Ирачаните беа домаќини, натпреварот се играше во градот Абха во Саудиска Арабија. Целата нокаут фаза се игра во оваа земја.
Додека едни веруваат дека Роналдо го направил тоа затоа што многу се грижи за голот што го постигнал, и дека на овој начин му се заблагодарил на Бога, други сметаат дека тоа е чиста провокација, со оглед на тоа што никогаш досега не се прекрстувал пред „Сиуууу!“ прославите, а трети дека го направил тоа за да ја тестира толеранцијата на Саудијците.
Ова не е првпат Роналдо да прави потези што предизвикуваат многу контроверзии во јавноста. Во март се фати за меѓуножјето откако беше навредуван од трибините, а само еден месец подоцна се поклони додека славеше гол.
Арапскиот куп на шампиони е натпреварување кое постои од 1981 година и е наменето за клубови од државите од арапскиот свет, членки на УАФА (Унија на арапски фудбалски асоцијации) каде членуваат земји од Азија и Африка. Најтрофејни се ирачкиот Ал-Рашид и тунискиот Есперанс со по 3 титули, но клубовите од Саудиска Арабија имаат најмногу титули - 8, а со оглед на тоиа што годинава финалето е помеѓу клубови од оваа држава, ќе бидат 9. Бранител на тронот сезонава беше мароканскиот Раџа Казабланка.
