Деведесет и три земји денеска гласаа за суспендирање на Русија од Советот за човекови права на ОН поради злосторствата во Буча и други места во Украина.
Единствениот друг актуелен член на Советот за човекови права на кој му беше суспендирано членството беше Либија во 2011 година, кога силите лојални на Моамер Гадафи насилно ги разбија антивладините демонстранти.
Дваесет и четири земји гласаа против нејзиното суспендирање од Советот, додека 58 нации беа воздржани. Македонија е меѓу земјите кои гласаа „за“ руското исфрлање од Советот за човекови права на ОН.
Потребно беше двотретинско мнозинство. Воздржаните не се броеја.
Веста на Twitter ја соопшти и украинскиот министер за надворешни работи Дмитро Кулеба, кој смета дека „на воените криминалци не им е место во институциите на ОН чија цел е заштита на човековите права“.
Тој изрази благодарност до членките кои „ја поддржаа одлуката и ја одбраа правилната страна на историјата“.
