Прославениот фудбалер и актуелен претседател на Фудбалскиот сојуз на Црна Гора, Дејан Савичевиќ, ги коментираше санкциите против рускиот спорт поради новонастанатата ситуација.
Савичевиќ истакна дека најмногу страдаат руските спортисти, иако не се виновни за ништо, а потсети и на санкциите кон Југославија кога ѝ беше одземено учеството на Европското првенство во 1992 година.
Наместо Југославија, Данска отиде на континенталниот шампионат во Шведска и успеа дури и да стане европски првак откако во финалето ја совлада Германија.
„Спортистите не се виновни. Југославија го доживеа истото во 1992 година“, рече Савичевиќ, а пренесува подгорички Dan.
Тој додаде дека не ја брани Русија и одлуката на Владимир Путин за воен напад на Украина.
„Јас не го бранам Путин, но на своја кожа доживеав исклучување поради политички избор. Играњето натпревари е секогаш порака за мир. Руските фудбалери немаат никаква врска со одлуката на Путин, исто како што ние немавме со војната во Југославија пред 30 години. Гледан обновување на истата ситуација која од 1992 година постепено ја доживуваа младите луѓе кои добро ги познававте во Италија: Михајловиќ, Југовиќ, Мирковиќ, Ковачевиќ, Мијатовиќ, Саво Милошевиќ. Покрај мене. Како фудбалер изгубив три голреми натпреварувања: ЕУРО 1992 и 1996, како и Светското првенството во 1994. Без причина освен поради политиката, која нема никаква врска со спортот“, рече Савичевиќ.
Тогаш Југославија заврши прва во квалификациската група за ЕУРО 1992, пред Данска која подоцна го зеде нејзиното место на завршницата. Југословенската репрезентација веќе беше на подготовки во Шведска кога на неколку дека пред почетокот на првенството стигна одлуката за суспензија, по што фудбалерите разочарани се вратија дома. Дел од тимот беше и нашиот Илија Најдоски, додека Дарко Панчев претходно изјави дека нема да игра поради лични причини.
„Веќе бевме во кампот каде што се подготвувавме за Европското првенство. Се сеќавам дека на 1 јуни стигна факс дека ни се воведени санкции. Не би сакал никој да го почувствува тоа. И покрај политиката, останавме во одлични односи. Звонимир Бобан, кој е Хрват, сè уште ми е еден од најдобрите пријатели, а во нашиот тим имавме Босанци, Црногорци, Срби, Македонци... Се квалификувавме на ЕУРО кое подоцна го освои Данска, која беше втора во нашата квалификациска група.. Затоа мислам дека требаше да им се дозволи на Русите да играат на неутрален терен“.
„Статутот на ФИФА и УЕФА е јасен по ова прашање. Фудбалот и политиката мора јасно да се разделат. Повторувам, чувствувам голема тага и болка кон Украина, секоја војна е погрешна. Дефинитивно не го поддржувам Владимир Путин. Сепак, ги прочитав изјавите на мојот полски колега и не се согласувам со него. Фудбалот и квалификациите не смеат да се користат за политички цели“, смета Дејан.
Поранешниот офанзивец не се согласува со одлуката на ФИФА за исфрлање на Русија од сите тековни натпреварувања. Руската репрезентација е во игра за пласман на Мундијалот во Катар, требаше да игра во баражите кон крајот на месецов, но со одлуката на ФИФА таа е исфрлена.
„Мислам дека требаше да си остане на сила одлуката руската репрезентација да игра на неутрален терен, без знаме и без интонирање на химната. Спортистите не треба да ја сносат вината за сè што се случува, треба да им се дозволи да се натпреваруваат. Ја повторувам приказната од свој агол, од нешто што го почувствував на своја кожа. И после толку години раните од ваквата одлука сѐ уште се чувствуваат. Јас и моите соиграчи тогаш почувствувавме неправда и тоа не треба да се повтори“, заврши тој.
