Откако минатиот месец Алијансата против пиратерија успеа да го затвори сајтот Extreme Download, сега уште еден заминува во историјата - Zippyshare најави дека ќе се угаси до крајот на месецов.
Без разлика дали редовно или повремено преземате пиратски содржини, во својата пловидба под црното знаме сигурно некогаш на форумите сте наишле на Zippyshare линкови преку кои сте го симнале она што сте го барале. За жал, и на овој сајт му дојде крајот. Од Zippyshare објавија дека сајтот ќе се угаси до крајот на март.
Доколку не знаевте, Zippyshare е веб-страница за бесплатно споделување фајлови. Лансиран е во 2006 година и веќе 17 години беше омилена дестинација на многумина што сакаа да споделат фајлови на интернет.
Поради својата едноставност, односно леснотијата за користење, овој сајт многу брзо стана доста користен и за делење пиратски материјал. Многу популарен беше и кај нас, на нашите форуми. Токму поради тоа гасењето на Zippyshare претставува губење на огромен број пиратерија која се споделуваше исклучиво преку овој сајт.
„Еј дечки, одлучивме на крајот на месецов да го згаснеме проектот. Ве замолуваме да направите бекап на вашите фајлови, имате речиси две недели тоа да го направите. До тогаш сајтот ќе работи без никакви проблеми. Веќе не сме во можност да го одржуваме сајтот. Ви благодариме што низ годините бевте со нас. Се гледаме во длабочините на интернетот“, е дел од објавата на тимот на Zippyshare.
Како главна причина за згаснувањето од Zippyshare го наведоа фактот што од самото основање нивниот сајт е со речиси непроменет облик, нарекувајќи го „диносаурус“, и како таков повеќе не може да се носи со конкуренцијата. Воедно, сајтот живее од реклами, а поради тоа што многумина користат софтвер за блокирање на рекламите, сајтот нема профит. Како трета причина го наведоа растот на цената на струјата, што поради големиот број сервери на кои се потпира сајтот значи и огромни трошоци.
