Благоја Милевски го сподели своето мислење за денешната жрепка за новата сезона од Лигата на нации која македонската фудбалска репрезентација ја смести во група со Бугарија, Грузија и Гибралтар.
„Групата е тешка, но во денешниот фудбал нема лесен противник, или однапред запишани бодови. Нѐ очекуваат сериозни натпревари“, вели селекторот Милевски, пренесува ФФМ.
Грузијците сигурно ќе бидат и тоа како накострешени да ни се одмаздат за елиминацијата во баражот за пласман на ЕУРО 2020. Политичките проблеми со соседна Бугарија ќе му дадат дополнителен шмек на нашиот дуел со оваа репрезентација, додека малиот Гибралтар секогаш цели кон изненадување и откинување бодови од поквалитетни репрезентации.
„Грузија е репрезентација против која одигравме неизвесни натпревари во последниот период. Бугарија одигра нерешено против европскиот првак Италија. Тоа значи дека нашиот противник бележи значителен напредок. Гибралтар се разбира дека не е истата селекција од првото издание на Лигата на нации кога се соочивме во иста група“, коментира Милевски.
„Македонија мора да биде на највисоко ниво на секој натпревар. Денешниот фудбал, едноставно не трпи поинаков пристап“.
