Северна Кореја соопшти за првите смртни случаи од COVID-19, еден ден откако за првпат пријави присуство на коронавирусот во земјата, скоро две и пол години по почетокот на пандемијата.
Државната новинска агенција КЦНА извести за 6 смртни случаи од последици на болеста, а вирусот SARS-CoV-2 се шири многу брзо во земјата. Еден од починатите бил позитивен на омикрон варијаната.
Агенцијата соопшти дека повеќе од 350.000 луѓе за краток временски период пријавиле зголемена телесна температура, додавајќи дека најмалку 162.200 од нив сега се целосно излечени. Според нив, причината за вирусот „не може да се идентификува“, но и дека „експлозивно се шири низ земјата“.
Не е јасно колку луѓе се заразени со коронавирусот.
Набљудувачите сметаат дека бројките говорат за потенцијални размери на епидемија на вирусот во земјата. Експертите долго време предупредуваа дека Северна Кореја ќе има тешкотии со соочување со голема епидемија поради несоодветниот здравствен систем.
Ким Џон Ун нареди локдаун во целата земја, градовите мора да бидат затворени. Нејасно е како луѓето ќе се снабдуваат со основни продукти бидејќи им е наредено да останат дома.
Според податоците на ОН, околу 26 милиони луѓе во Северна Кореја се недохранети.
