Кристин Дејвис, Сара Џесика Паркер и Синтија Никсон ќе се вратат во улогите на Шарлот, Кери и Миранда во обновената верзија на „Sex and the City“ на HBO Max.
Серијата „Sex and the City“ доби ново руво во 2021 и најавено е дека ќе се стримува на американската платформа HBO Max. Долго време кружеа гласини дека се размислува за „оживување“ на популарната серија од крајот на 90-тите и почетокот на 2000-тите, а сега имаме и официјална потврда и тоа од оригиналните ѕвезди кои ја споделија веста со фановите преку социјалните мрежи.
Обновената серија ќе се вика „And Just Like That…“ (сигурно ја препознавате познатата реплика на Кери Бредшо), а извршни продуценти ќе бидат Паркер, Дејвис, Никсон и Мајкл Патрик Кинг.
Ким Катрал, која беше дел од оригиалната актерска екипа и ја играше Саманта Џонс, нема да биде дел од новата серија.
Фановите веќе се возбудени од најавата и ги преплавија социјалните мрежи:
Приказната во „Sex and the City“, што почна да се емитува во 1998 година, се вртеше околу секс-колумнистката Кери Бредшо (Паркер) и нејзините пријателки Миранда Хобс (Никсон), Шарлот Јорк (Дејвис) и Саманта Џонс (Катрал), нивните врски и љубов кон модата во Њујорк. Серијата се емитуваше шест сезони, освои седум Еми награди и осум Златни глобуси.
Серијата се снимаше според истоимената книга на Кендис Бушнел и иако добиваше пофалби за рушење на секс табуата, сепак наиде и на критики поради недоволниот диверзитет и ноншалантното третирање на некои многу важни теми, како расната дискриминација и еднодимензионалното и стереотипно претставување на одредени групи граѓани.
Трејлерот за новата серија се состои од сцени од прометниот Њујорк и најава за името на серијата.
Дејството наводно ќе се врти околу трите пријателки кои сега се во петтата деценија од животот. Серијата ќе се состои од десет 30-минутни епизоди, а со снимање ќе почнат пролетва во Њујорк.
