Саудискиот газда на Њукасл веднаш по преземањето на клубот за прва трансфер цел го има голгетерот на Лацио и тоа со понуда која не се одбива.
Доколку сѐ мине во најдобар ред и Јасир Ал-Румајан преку саудискиот Јавен инвестициски фонд стане нов газда на Њукасл, тогаш главната трансфер цел на клубот ќе биде најдобриот голгетер во италијанската Серија А, Чиро Имобиле.
Во дресот на римски Лацио 30-годишниот Чиро растура последниве четири сезони постигнувајќи вкупно 116 голови во сите натпреварувања. Сезонава со 27 гола е најдобар стрелец во Серија А и тешко веројатно дека до крајот некој ќе го престигне.
Лацио во јануари одби 60 милиони евра од кинескиот клуб Далијан Про, а во преговори е со играчот за потпишување на нов договор со кој Имобиле би се обврзал на верност до 2025 година.
Сепак, примамливата понуда со амбициозниот проект на премиерлигашот може да го привлече Имобиле да се проба и на Островот откако имаше неуспешни авантури во Бундеслигата и во Ла Лига настапувајќи во боите на Борусија Дортмунд и Севиља.
Според шпекулациите кои доаѓаат од Англија, Имобиле на „Сент Џејмс Парк“ би заработувал 8 милиони евра по сезона со 5-годишен договор, пренесува La Gazzetta dello Sport.
