Воениот бунт на Вагнер во Русија го привлече вниманието на целиот свет, а реакцијата на Владимир Путин сигурно ќе предизвика нови дебати. За само еден ден тој премина од „жесток одговор“ на безусловно ослободување на бунтовниците и стопирање на сите кривични постапки.
Вагнеровите борци синоќа, по наредба на Пригожин, организираа воен бунт и го зазедоа градот Растов на Дон. Шефот на Вагнер најави дека кон Москва ќе се движат и војската и оклопните возила.
По хаосот што владееше, претседателот Владимир Путин имаше вонредно обраќање до сите граѓани и рече дека воениот бунт на Вагнер е предавство на неговите „соборци кои сега се на фронтот, предавство на државата и нож во грб“.
Тој исто така нагласи дека сите што учествувале во ова ќе одговараат строго за своите постапки.
„Овој внатрешен бунт е смртен удар за нас, нашиот одговор ќе биде жесток, сите што решиле да се побунат ќе бидат казнети. Тие ќе одговараат пред државата и рускиот народ. Како претседател на Русија и граѓанин, ќе направам сѐ за одбрана на земјата, животите и слободата на луѓето. Ова е нож во грб“, рече тогаш Путин.
Сепак, белорускиот претседател Александар Лукашенко за помалку од 24 часа успеа да се договори со шефот на Вагнер да ја запре армијата која беше блиску до Москва.
Не долго после тоа, Кремљ потврди дека Пригожин ќе може да ја напушти Русија и да замине во Белорусија без пречки, и дека сите кривични постапки во врска со воениот бунт ќе бидат прекинати. Гаранција за тоа е „зборот на претседателот“ на Русија.
За неполни 24 часа исчезна ветувањето за „жесток одговор“ и казнување на сите одговорни.
