Две швајцарски компании ќе ги претворат застарените сателитски антени на Алпите во огромни соларни панели и на тој начин ќе ги искористат предностите на планинскиот терен за производство на зелена енергија.
Тоа е втора инсталација од ваков вид во градот Леук во кантонот Вале за претворање стара антена во електрана.
Сместени на планина, соларните панели ќе добиваат повеќе директна сончева светлина, особено во зимските месеци, отколку кога би биле инсталирани во близина на замаглени, пониски урбани области.
„Поранешните сателитски чинии се идеални како системи за соларна енергија“, изјави CKW Group, компанија за енергетски услуги, која соработува на овој проект со локалната компанија Leuk Teleport and Data Center, пренесува Reuters.
Во соопштението се наведува дека антените може флексибилно да се усогласат со сонцето и на тој начин да произведуваат повеќе електрична енергија од конвенционалните панели.
Една таква антена може да ги задоволи енергетските потреби на 25 домаќинства, објави CKW Group.
Антените покриени со соларни панели имаат пречник од 32 метра и се наоѓаат на околу 1.000 метри надморска височина, што им овозможува да примаат оптимално ниво на сончева светлина дури и во зима, пренесува BETA.
Во август минатата година швајцарската влада почна кампања за охрабрување на потрошувачите и компаниите да штедат енергија со цел да се спречи недостигот на гас и електрична енергија.
