Два од трите македонски претставници во новото натпреварување на УЕФА почнаа со идентичен нерешен резултат.
Силекс на пеколното сонце на стадионот „Петар Милошевски“ во скопската населба Ново Лисиче го пречека молдавскиот претставник Петроклуб од градот Хинчести.
Кратовци, кои во Европа конференциската лига изборија пласман откако го освоија Купот на Македонија, а потоа испаднаа од 1.МФЛ, поведоа уште во 5. минута кога еден контра напад имаше одлична завршница откако Бојан Рајков му сервираше на Кристијан Додевски, а овој одлично ја смести топката зад грбот на гостинскиот голман Микаел Мејра.
Пред самиот крај на прво полувреме, длабоко во судиското надополнување по едно невнимание на домашната одбрана гостите од Молдавија го израмнија резултатот преку Серџу Платика.
До крајот немаше промени, па со резултат од 1:1 Силекс патува на реваншот во Молдавија закажан за наредниот четврток од 19:00 часот.
Струга гостуваше на Балтикот во латвискиот град Лиепаја кај истоимениот клуб. Домашните вп 31. минута поведоа преку Бразилецот Додо, а македонскиот клуб од пораз се спаси во третата минута од судиското надполнување благодарение на голот на Бесир Исени.
Реваншот помеѓу Струга и Лиепаја ќе се игра за точно седум дена на „Петар Милошевски“ во Скопје од 17:00 часот.
Вечерва од 20:00 часот и третиот македонски претставник, Шкупи, го игра својот натпревар притив косовски Љапи на „Тоше Проески“ националната арена во македонската престолнина.