Земјотрес со јачина од 5,2 степени според Рихтеровата скала синоќа ја погоди Источна Турција, објави Европско-медитеранскиот сеизмолошки центар (ЕМСЦ).
Епицентарот бил во близина на градот Малатија на длабочина од 11 километри.
Најмалку 23 лица се повредени. Турскиот министер за здравство изјави дека повеќето од повредите се предизвикани од падови или скокови од голема височина.
Центарот за следење на земјотресот во Истанбул извести дека земјотресот се случил во четвртокот во 20:47 часот по локално време. Неговиот епицентар бил во малиот град Јешиљурт во провинцијата Малатија.
Провинцијата беше меѓу тешко оштетените од земјотресот на 6 февруари. Градоначалникот Селахатин Гуеркан изјави дека во Малатија загинале околу 2.300 луѓе во земјотресот на почетокот на годинава.
На 6 февруари, два големи и многу последователни потреси ја опустошија Југоисточна Турција и Северна Сирија, при што загинаа повеќе од 50.000 луѓе.
На социјалните мрежи се споделуваат снимки од моментот кога се случил земјотресот.
