Веднаш по последниот свиреж на вчерашниот натпревар, Диего Симеоне трчаше кон тунелот без да му честита на својот колега за победата, а сето тоа убаво сите го видоа на директниот пренос.
Ливерпул синоќа оствари важна победа од 3:2 на гостувањето во Мадрид кај Атлетико, иако домашните успеаја да се вратат во игра по негативата од 0:2. Потоа од пенал Мохамед Салах го постигна победничкиот гол, а тимот на Симеоне беше и со играч помалку поради исклучувањето на Антоан Гризман поради груб фаул. Згора на тоа, имаше ситуација во која домаќините бараа пенал, но не им беше досуден.
Она што на сите им падна в очи беше реакцијата на предводникот на Атлетико, Диего Симеоне, кој по натпреварот наместо да се поздрави со својот колега Јирген Клоп, како што е традиција, веднаш почна да трча кон тунелот, а Германецот викаше по него.
„Не ни се допаѓа тоа, но да, ситуацијата е јасна. Сакав да се ракувам со него. Неговата реакција, како и мојата, не беше во ред, но двајцата бевме емотивни. Наредниот пат кога ќе се видиме дефинитивно ќе се поздравиме. Ништо страшно. Тој беше изнервиран, не поради мене, туку поради натпреварот. Нема ништо друго“, рече Клоп за постапката на Симеоне, а и за неговите викотници по него.
„Никогаш не се ракувам по натпреварите бидејќи не ми се допаѓа тоа. Не е здраво ниту за тој што победува, ниту за тој што губи. Јас така го гледам тоа. Но, сега кога ќе го видам ќе се поздравам со него без проблем“, објасни Симеоне кој отсекогаш важел за посебен карактер.
Шанса за ракување ќе имаат веќе наредното коло кога повторно се среќаваат нивните два тима, но овој пат во Ливерпул на 3 ноември.
