Голгетерот на Милан жари и пали сезонава на Чизмата, а со двата гола во мрежата на Наполи синоќа израмни еден рекорд и сруши друг во италијанскиот фудбал.
Златан Ибрахимовиќ синоќа му даде два гола на Наполи и беше главен виновник за победата на Милан од 3:1. Со тоа тој ја продолжи и голгетерската серија постигнувајќи барем по еден гол на секој натпревар во Серија А сезонава.
Ибра е само четврти играч кој успеал да постигна гол на шест натпревари во низа на почетокот од сезоната. Во Серија А се играше 8. коло, но Ибра оправдано пропушти две кола откако беше позитивен на коронавирусот. Така, на сите натпревари на кои играше се запиша во листата на стрелци.
Останатите тројца на кои им успеал таков подвиг се: Габриел Батистута играјќи за Фиорентина во сезоната 1994/95, Кристијан Виери играјќи за Интер во 2003/03 и Криштоф Пјонтек играјќи за Џеноа во 2018/19.
Воедно, тој постави и друг рекорд - за најстар играч кој постигнал 10 голови во првите 8 кола во Серија А. Досега тој рекорд го држеше легендарниот Силвио Пиола кој во сезоната 1942/43 го постави на 29-годишна возраст. Швеѓанецот тоа го направи на 39 години, рекорд кој тешко дека некој ќе успее да го сруши.
Статистиката на Ибра сезонава во Серија А:
1. коло: 2 гола против Болоња
2. коло: не играше против Кротоне поради COVID-19
3. коло: не играше против Специја поради COVID-19
4. коло: 2 гола против Интер
5. коло: 2 гола против Рома
6. коло: 1 гол против Удинезе
7. коло: 1 гол против Верона
8. коло: 2 гола против Наполи
Ако вака продолжи, ќе пишуваме за уште срушени рекорди од забрефтаниот Швеѓанец.
