По објавувањето на уредот Project Q во март, Sony официјално го претстави преносниот уред за „далечинско играње“ наречен PlayStation Portal.
Уредот ја користи функцијата PS Remote Play, овозможувајќи му на играчот каде било да игра игрици наменети за конзолата PlayStation 5, а единствениот услов е да има Wi-Fi конекција. PS Portal бара минимална брзина на интернет од 5Mbps за да функционира, додека Sony препорачува брзина од 15Mbps за оптимално искуство со играње. Можно е да се играат само поддржани игрици кои се инсталирани на PS5 конзолата, а Sony забележува дека уредот нема да поддржува PlayStation Plus Premium cloud streaming. Исто така, нема да може да се покренуваат други игрици или видео.
PS Portal има 8-инчен LCD екран со резолуција од 1.080 пиксели и брзина на освежување од 60Hz, како и иста конфигурација на контроли како контролерот PS5 DualSense. Уредот има и USB-C приклучок, како и 3,5 мм приклучок за слушалки, а одозгора има и звучници. Другите спецификации сѐ уште не се откриени.
Она што е чудно е што PS Portal не поддржува Bluetooth, туку само Wi-Fi и PlayStation Link, стандардот на Sony за безжично поврзување што обезбедува мала латентност, спречува губење на звук и овозможува префрлување помеѓу компатибилни уреди. Оваа технологија е дел од новите безжични слушалки на Sony Pulse Explore кои чинат 220 евра, како и слушалките Pulse Elite чија цена е 150 евра.
PlayStation Portal чини 220 евра, а на пазарот ќе се појави нешто подоцна годинава.
