Играчот од средниот ред на македонската репрезентација е оптимист во пресрет на баражот против Косово, но ја напоменува и важноста на овој натпревар оквалификувајќи го како веројатно најважниот во кариерите на сите кои се во составот.
Потребна е победа против Косово кој е првата од двете пречки на Македонија до Европското првенство. Победа в четврток нѐ носи во финалниот бараж против Грузија или Белорусија во ноември.
„Од моја гледна точка можеби еден од најважните натпревари во мојата кариера. Национален дрес, Европско првенство... ќе играме без публика, но ако направиме добар резултат мислам дека имаме големи шанси да играме на ЕУРО“, вели Стефан додека неговите колеги од репрезентацијата тренираа денеска на стадионот „Петар Милошевски“ кај седиштето на ФФМ.
Кои се предностите на репрезентацијата на Македонија?
„Поквалитетен тим, според мене, домашен терен и... не знам што повеќе би додал... борба, тоа не е предност, но треба да дадеме сѐ од себе. Како што кажав: еден од најважните натпревари“.
Што значи доаѓањето на Горав Пандев за националниот тим?
„Па знаеме што е Горан Пандев за македонската репрезентација. Тој е лидер, капитен, најдобар играч... само суперлативи за Горан Пандев. Тој ќе значи многу на овој натпревар и треба да го искористиме“.
„Најважен натпревар на кариерите - тоа е. Не знам друго што, да го чекаме осми и да покажеме на терен, како што слушам јас, дека сме биле фаворити. Треба да го покажеме тоа на терен, да го искористиме домашниот терен и да ги израдуваме навивачите“, заврши Стефан.
