За руската вакцина наголемо се зборува уште откако беше најавена, а сега откако се покажа дека е 91,6% ефикасна и тоа без несакани ефекти, уште повеќе зема замав. Но, има една дилема, а тоа е нејзиното име.
Уште кога институтот Гамалеја ја регистрираше во Русија ѝ го даде името Гам-КОВИД-Вак, односно Гамалеја COVID-19 вакцина, во кое ништо нема врска со V. Но, стана јавно позната по краткото име Спутник V во чест на првиот сателит во вселената, советскиот Спутник, со додавката V, која ја создаде и заблудата.
Што значи тоа V? Дали е римскиот број 5 па треба да значи петтиот Спутник? Или пак е латинската буква Ве, односно нашата В, па да значи Спутник Вакцина?
Ако помисливте дека V е за virus (вирус), повторно грешите.
Ќе откриеме веднаш дека V не е бројката 5, туку е сепак буквата В на латиница.
Кирил Дмитријев е главен човек на Рускиот фонд за директни инвестиции и тој во една прилика објасни што всушност значи V.
„Буквата V во името на нашата вакцина значи 'победа' и на аргентинскиот народ му посакуваме изрична победа над оваа болест“, откри Дмитријев кога некаде пред Нова година Аргентина ја почна набавката на руската вакцина, а на Аргентинците не им беше јасно името на вакцината.
Така, V доаѓа од латинскиот збор victoria кој значи 'победа', алудирајќи на тоа дека Спутник вакцината ќе донесе победа над вирусот.
Во Русија изговорот на вакцината е Спутник Ви.