Пол Погба, на 4 години суспендираниот француски ас и играч на Јувентус, доби интересна понуда од Русија да игра во приватната Лига на богатите.
Според Tuttosport, Погба (30) бил поканет од тимот Броук Бојс, кој се натпреварува во Медиа Футбол Лиг, проект создаден во 2022 година со тимови формирани од славни селебрити личности од сите сфери на животот, вклучително и актери, спортисти и пејачи.
Спортскиот директор Артјом Чатјатурјан за Tuttosport изјави дека контактирал со менаџерот на Погба, Рафаел Пименто, и му понудил сместување, 1.500 евра месечно и пристап до медицинскиот центар, како и некои бонуси.
„Повеќе од ова не можеме да ви понудиме поради клупската политика“, стои на крајот од понудата на Броук Бојс, која ја објави Tuttosport.
Погба целата своја професионална кариера ја помина во два клуба - Манчестер Јунајтед и Јувентус. На 16 години замина од Авр во академијата на Манчестер Јунајтед, а сѐ останато е добро познато. Допинг скандалот и четиригодишната суспензија најверојатно ќе означат крај на неговата професионална кариера
Погба освои 4 шампионски титули и 2 купа со Јувентус, сите во неговиот прв мандат во клубот. Играјќи за Манчестер Јунајтед ги освои Лига купот и Лига Европа. Со репрезентацијата на Франција беше светски првак во 2018 година токму во Русија.
