Омикрон варијантата го предводи актуелниот бран на COVID-19 во Европа, па земјите мора да ја забрзаат вакцинацијата и повторно да воведат мерки како носење маски за да се избегнат построги мерки во есен и зима, рече регионалниот директор на Светската здравствена организација (СЗО) за Европа.
Во интервју за Reuters, Ханс Клуге ги повика земјите да преземат итни мерки за да се избегне преоптоварување на здравствените системи поради брзото ширење на подваријантата омикрон BA.5. Речиси три милиони нови случаи на COVID-19 беа потврдени минатата недела во европскиот регион, што претставува речиси половина од сите нови случаи ширум светот.
Стапките на хоспитализација се удвоија во истиот период, а скоро 3.000 луѓе умираат од COVID-19 секоја недела, рече Клуге.
„Имаме зголемување на случаите...во општество кое функционира речиси како пред ковид“, рече Клуге. Тој ја нагласи потребата од таканаречените стабилизатори на пандемијата, како што е втора доза вакцинација пред најавените вакцини за специфични варијанти наесен и промоција на носење маски и проветрување на просториите.
Овие стабилизатори мора да се применат за да се избегнат многу построги мерки, предупреди тој. „Мислам дека општеството не е подготвено да нареди затворање“, посочи тој.
