Стапката на заразување со COVID-19 во Европа е алармантна, предупреди денеска Светската здравствена организација (СЗО).
СЗО исто така ги предупреди европските земји да не го скратуваат времетраењето на задолжителниот карантин.
Регионалниот директор на СЗО за Европа, Ханс Клуге, рече дека бројот на случаи на коронавирус во Европа треба да послужи како „аларм за будење за сите нас“.
„Иако овие бројки повеќе се одраз на посеопфатното тестирање, исто така покажуваат алармантна стапка на пренесување на вирусот низ регионот“, рече Клуге на онлајн прес-конференцијата од главниот град на Данска, Копенхаген.
СЗО исто така рече дека нема да ги смени препораките за задолжителен 14-дневен карантин за сите изложени на новиот коронаирус.
„Нашите препораки за карантин се 14 дена и тие се базирани на нашите сознанија за периодот на инкубација и пренесување на болеста. Препораките би ги ажурирале само кога би се смениле нашите научни сознанија“, рече Кетрин Смолвуд, висок службеник за вонредни ситуации на СЗО Европа.
Во Франција, на пример, препорачаниот период на карантин во случај на изложеност на коронавирусот беше намален на 7 дена.
Карантинот е намален на 10 дена во Велика Британија и Ирска, а некои други европски земји, вклучувајќи ги Хрватка и Португалија, размислуваат за намалување на времетраењето на двонеделниот карантин.
Во 53-те земји членки на СЗО Европа имаат регистрирано речиси 5 милиони случаи на COVID-19 и над 227.000 смртни случаи поврзани со болеста.
Бројот на дневни потврдени случаи во моментов се движи меѓу 40.000 и 50.000, а треба да се напомене дека во некои земји значително е зголемен обемот на тестирање. Колку за споредба, на 1 април беше регистриран рекорден број од 43.000 случаи во еден ден, а на 11 септември рекордот беше срушен со 54.000 случаи регистрирани во 24 часа.