Светската здравствена организација (СЗО) денеска повторно соопшти дека поради недостигот на „соодветни податоци“, не можат да се дадат препораки во врска со комбинацијата на различни вакцини против коронавирусот, што Франција го планира при ревакцинацијата на лицата помлади од 55 години кои ја примиле првата доза на вакцината на AstraZeneca.
Нема соодветни податоци врз основа на кои би можело да се каже „дали може тоа да се направи“, па затоа експертите на СЗО заклучија дека „не може да се препорача комбинирање на вакцини во овој момент“, истакна портпаролката на СЗО, Маргарет Херис на редовниот брифинг со новинарите во Женева.
Таа нагласи дека таквиот став го усвоила Стратешката експертска советодавна група за имунизација (SAGE) во февруари за време на објавувањето на препораките за вакцината на AstraZeneca и пред информациите за евентуална поврзаност на тој препарат со многу ретки несакани ефекти што беа регистрирани.
– Научниците тогаш побараа да се испита можноста за комбинирање на вакцини против COVID-19, изјави Херис.
Француските власти неодамна донесоа одлука луѓето на возраст под 55 години, кои ја примиле првата доза на AstraZeneca, да бидат ревакцинирани со Pfizer или Moderna, врз основа на mRNA.
Одлуката се однесува на околу 533.000 луѓе во Франција, каде вакцинацијата со AstraZeneca за помлади од 55 години беше прекината на 19 март поради појава на ретки случаи на тромбоза во Европа, како несакан ефект од употребата на тој препарат.
Европската агенција за лекови (ЕМА) во средата објави дека индивидуалните случаи на згрутчување на крвта по имунизација со вакцината на AstraZeneca се „ретки несакани ефекти“ на вакцината и не можат да бидат поврзани со возраста, полот или историјата на болести.
Ставот на ЕМА е дека придобивките од вакцината се поголеми од ризиците.
