Европскиот вселенски телескоп Euclid денеска ги испрати првите снимки од брилијантна маглина во облик на коњска глава, досега невидена далечна галаксија и „индиректни докази“ за постоењето на невидлива темна материја.
Euclid (Евклид), именуван по познатиот грчки математичар, беше лансиран во јули на првата мисија во светот за проучување на космичките тајни на темната материја и темната енергија.
Неговата задача е да мапира третина од небото кое вклучува две милијарди галаксии со цел да создаде прецизна 3Д мапа на универзумот. Откако стигна на 1,5 милиони километри од Земјата, европската сонда почна да ги испраќа првите снимки објавени денеска од Европскиот центар за вселенски операции во Дармштад, Германија.
„Неверојатни и импресивни снимки кои нè потсетуваат дека е важно да се оди во вселената за да дознаеме повеќе за нејзините тајни“, рече Јозеф Ашбахер, шеф на Европската вселенска агенција (ESA), во изјавата. Меѓу нив е и снимката на маглината Коњска глава во блиското соѕвездие Орион, како и спирални и „неправилни“ галаксии.
Рене Лаурејс, главниот научник на проектот, рече дека „најинтересната“ слика е од јатото Персеј (на сликата подолу), кое вклучува илјада галаксии додека во позадина се повеќе од 100.000 галаксии, од кои некои се оддалечени 10 милијарди светлосни години и никогаш претходно не биле видени.
Специјалноста на Euclid е тоа што има широко видно поле „невидено во историјата на астрономијата“, изјави за AFP Жан-Шарл Куиланд, астроном и физичар во Комисијата за атомска енергија (CEA), која е членка на конзорциумот Euclid.
Благодарение на овој широк поглед, телескопот, опремен со два уреди (оптички и близок инфрацрвен), може да прави толку големи слики со висока резолуција. Сето тоа го прави исклучително брзо: му биле потребни само осум часа за првите пет фотографии.
ЕСА го опишува Euclid како „детектив од темната страна на вселената“ чија мисија е да истражи зошто 95 проценти од универзумот се состои од темна материја и енергија за кои не знаеме речиси ништо.
