Се појави најново видео што покажува дека во Tesla сè уште не ги решиле проблемите поврзани со контролата на квалитетот на своите автомобили.
Иако моделите на Tesla се едни од технолошки најнапредните електрични автомобили на пазарот, овој американски производител сè уште не е во состојба да ги надмине дури и најбаналните недостатоци, како што се лошо офарбана надворешност или слабо поврзани панели на каросеријата.
На интернет можете да најдете еден куп видеа во кои новите сопственици на Model 3 и Y се жалаат на овие и слични проблеми, а најновото видео во врска со слабиот квалитет на новите автомобили Tesla го објави YouTube корисникот на TechChris.
Недостатоците што ги открил на неговиот штотуку купен Model 3 се многубројни, иако тешко се забележуваат на прв поглед. Дури по преземањето и деталниот преглед на возилото, тој сфатил како невешто е составен автомобилот.
Како што тврди, да го видел сето тоа при преземањето на возилото, ќе одбиел да го прифати автомобилот во таква состојба. Како и да е, бидејќи сакал што побрзо да биде во сопственост на неговиот нов Tesla автомобил, а и бидејќи според договорот може да изврши преглед на возилото одвнатре само по примопредавањето, тој пропуштил многу недостатоци.
Производителот, се разбира, се обврза дополнително да ги отстрани сите проблеми, но тоа значи дека сопственикот некое време ќе остане без својот автомобил, што дополнително ги фрустрира клиентите.
Една од причините зошто автомобилите на Tesla излегуваат од фабриката во ваква состојба е желбата на Илон Маск по секоја цена да ја постигне поставената цел - 500.000 испорачани возила во 2020 година.
Имајќи предвид дека сериозно заостануваше по третиот квартал, не изненадува што за да го надополни изгубеното време, производителот прави вакви грешки.
