Мексиканскиот претставник ќе игра против Палмејрас откако со 2:1 го елиминираше шампионот на Азија во дешениот прв натпревар од Светското клупско првенство кое се одржува во Катар.
Клупскиот мундијал на ФИФА почна денеска со дуелот помеѓу шампионите на северноамериканската и азиската Лига на шампиони.
Јужнокорејскиот тим на Улсан Хјундаи прв поведе кога во 24. минута капитенот Ким Ки-Хи го отвори резултатот со гол со глава по нафрлување од корнер од страна на Јун Бит-Гарам.
Потоа Мексиканците направија комплетен пресврт, а главен инспиратор беше Фрнацузинот Андре-Пјер Жињак, кој веќе шеста сезона игра во Тигрес. Прво во 38. минута израмни на 1:1 откако одлично беше проигран со глава од дефанзивецот Диего Рејес, а во 4. минута од судиското надополнување реализираше удар од белата точка кој Тигрес го доби поради игра со рака.
Во вториот дел Кореанците не успеаја да го израмнат резултатот иако во 58. минута Јун Бит-Гарам постигна ефектен гол кој беше поништен поради офсајд.
Со оваа Тигрес се избори за дуел со шампионот на јужноамериканската Копа Либертадорес, тимот на бразилски Палмејрас кој во саботата се заќити со ова признание.
Денеска се игра и натпреварот помеѓу африканскиот шампион Ал Ахли од Египет и домашниот претставник Ал-Духаил кој почнува во 18:30 часот, а директен пренос ќе оди на МРТ 3. Победникот ќе игра против Баерн, шампионот на Европа.
Двете полуфиналиња се закажани за претстојниот викенд. Палмејрас - Тигрес се игра в сабота од 19 часот, додека второто полуфинале е в недела во истото време.
Клупскиот мундијал традиционално требаше да се игра во декември, но поради пандемијата и тој претрпе поместување.
