Легендарниот шведски фудбалер по половина година се враќа во Милан, но не во улогата што претходно ја имаше.
Златан Ибрахимовиќ летоска стави крај на богатата кариера во која на Милан му ги донесе шампионските титули на Италија во две различни епохи. Сега се враќа во сосем нова улога, која италијанските медиуми сѐ уште целосно не ја дешифрирале.
Синоќа во Миланело беше одржан клучен состанок на раководството на клубот со Златан и беше договорена соработка за наредниот период. Угледниот новинар Николò Скира потврди дека Ибрахимовиќ се враќа во клубот кој отсекогаш најмногу го сакал.
Иако неговата улога во тимот не е дефинирана во медиумите, она што Италијанците го открија е дека ќе има една од клучните улоги во спортскиот дел на тимот, и ќе соработува со тренерот Стефано Пиоли. Секој што го гледал Милан последниве години знае колку беше важна неговата улога во мотивирањето на тимот.
Дури и тренерот Пиоли веќе зборуваше за тоа дека Златан треба да се врати во Милан и дека се радува на таква соработка со него. Голманот Мајк Мењан порача дека нешто послабите резултати сезонава се бидејќи тимот го изгубил својот лидер во Ибрахимовиќ.
Швеѓанецот утринава со објава на социјалните мрежи ги запали навивачите на Милан најавувајќи го неговото враќање меѓу „Росонерите“. Објави фотографија со која го одбројува времето на неговото враќање во клубот пишувајќи едноставно „тик так тик так“.
