Поранешниот репрезентативец, член на златната генерација, денеска е назначен за нов спортски директор на клубот од Градски парк.
Тодор Гечевски и официјално е новиот спортски директор кој ќе раководи со КК Работнички.
„Со стабилниот буџет и подготвеноста на тимот очекуваме нови победи и враќање на стариот сјај. Ги повикувам навивачите да излезат на трибини и сите заедно да дадеме поддршка. Да бодриме и да го вратиме КК Работнички на старите победнички стази!“, објави градоначалникот ан Општина Центар, Горан Герасимовски.
46-годишниот Гечевски во два наврата во својата кариера играше за Работнички, каде во 2015 година и ја заврши кариерата. 2,10 високиот центар со клубот од Градскиот парк има една лигашка (2003/2004) и две куп титули (2003/2004 и 2014/2015). На ЕвроБаскетот 2011 во Литванија беше еден од најдобрите поединци во големиот подвиг кога Македонија заврши четврта.
Токму вечерва стартува новата сезона во најдобрата домашна лига, а Работнички од 18 часот во салата „Кале“ ќе го пречека ТФТ. Натпреварот ќе оди во живо на МРТ3, но и стримуван на YouTube.
Работнички доста се засили во пресрет на новата сезона, па на стартот стручниот тим на „Црвено-белите“ ќе има прилика да види како изгледа, прилично реновираниот состав во кој има голем број на нови играчи. Последниот од нив, репрезентативецот Кристијан Николов, кој ја засили бековската линија во која како нови лица се и Бобан Стајиќ, Американецот и Дмитрик Трајс, а од староседелците, тука е и младиот репрезентативец Андреј Шошкиќ, потоа Филип Бакоч, Леонид Тодоровски и Ѓорѓе Џелетовиќ. Нови имиња во ростерот на Работнички за новата сезона се Роберт Рикиќ, Квентон Декоузи, како и уште еден репрезентативен двоец, Виктор Ефремовски и Стојан Ѓуроски, кои ќе ги пополнат надворешните позиции.
