Македонскиот фудбал доби интернационалец на егзотична дестинација и тоа во карипската земја Доминиканска Република.
Борче Сркески својот 21 роденден на 23 месецов ќе го прослави каде што веројатно никогаш не ни помислил - во Доминиканската Република.
Се работи за клубот Делфинес дел Есте од градот Ла Романа и е доста млад, формиран пред само 7 години. Минатата 2020 сезона, која се играше по скратен систем поради пандемијата, клубот за малку не ја круниса со шампионска титула бидејќи во разигрувањето за шампион загуби во финалето од Универсидад О&М.
Сркески игра во одбраната, а кариерата ја почна во Победа. Играше уште и за Академија Пандев и Питу Гули, а од октомври ги бранеше боите на Росоман 83. Интересно, никогаш не играл во најдобрата македонска лига, но затоа стана интернационалец.
„Благодарение на преговорите на нашиот спортски директор на Балканот, Стефан Ристиќ, сакаме да највавиме и да му посакаме добредојде на младиот талент од Северна Македонија, Борче Сркески, во фамилијата на Делфинес. Ова не завршува тука, има уште изненадувања. Бидејќи не сме единствени, сакаме да бидеме најдобри...“, објави клубот при промоцијата на Македонецот.
Доминиканската Република воопшто не е позната по фудбалот. Репрезентацијата им е доста слаба: ниту еднаш немаат настапувано на Северноамериканското првенство, а не се квалификуваа ниту на последните две изданија од Карипскиот куп каде, погодувате, настапуваат претежно слаби островски репрезентации. Затоа, пак, ги бива за бејзбол и после Американците играчите од Доминиканската Република се најзастапени во МЛБ. Во последно време во пробив им е и кошарката, играат на Светксите првенства, а имаат и неколку играчи во НБА. Имаат и неколку шампиони во бокс.
