Реал Мадрид го донесе Еден Азар во летото 2019 година како големо засилување од Челси за 115 милиони евра, а „Кралскиот клуб“ сакаше тој да продолжи да ги следи стапките на Кристијано Роналдо.
Азар стана најскапиот играч во историјата на Реал, поскап дури и од Роналдо и Герет Бејл, а се очекуваше да биде залог за освојување трофеи и одлучување за најголемиот и најважен натпревар за кралскиот клуб - Ел Класико против Барселона.
Но, Азар целосно се покажа како трансфер промашување, можеби и најголемо во историјата на Реал.
Поради честите повреди и неподготвеноста, тој за речиси четири години одигра само 73 натпревари за Реал, а неговата статистика е особено поразителна кога се во прашање натпреварите со Барселона.
Синоќа се одржа десеттото Ел Класико откако Азар стана играч на Реал, а на него по десетти пат не одигра ниту минута.
Азар синоќешниот натпревар и поразот на Реал од Барселона го следеше од клупата, со што го прослави неславниот јубилеј.
Од десетте Ел Класико, шест од нив гледал од клупата за резервни играчи, додека четири пати не бил ниту на клупата поради повреда.
Интересно, Азар во кариерата двапати играше против Барселона, но двата пати како играч на Челси.
