Луѓето и компаниите кои одлучуваат да купат електричен автомобил ја земаат предвид неговата набавна цена и потрошувачката при возење. Сепак, има и скриена потрошувачка кога автомобилот е во мирување.
Истражувањето спроведено од белгискиот енергетски стартап Re.alto покажа дека трошоците можат да бидат и до 600 евра годишно, доколку се земат предвид цените на струјата во Белгија.
Re.alto е стартап кој се потпира на размена на податоци за енергија. Оваа компанија има договор со неколку производители на автомобили за обработка на податоци од електрични возила.
„Менаџерите на возните паркови ни кажаа дека проценетата потрошувачка често не соодветствува со вистинската. Ова набљудување нè поттикна подлабоко да ја анализираме потрошувачката“, рече Дитер Јонг од белгискиот стартап.
Дитер Јонг и неговиот тим открија дека дополнителната потрошувачка на електрична енергија е предизвикана од потрошувачката за време на одмор во т.н. Sleep Mode. Загубата се покажа поголема од очекуваното.
„Автомобилите што мируваат цел ден трошат, во зависност од моделот, околу 3 kWh дневно. Тоа одговара на вкупна вредност од 1000 kWh годишно“, пишува Monenergie.be.
Електричните автомобили постојано пренесуваат податоци до корисничката апликација: температура, статус на батеријата... Сепак, електричните автомобили се оптимизирани за возење, а не за пренос на податоци. Овој процес троши многу повеќе енергија отколку паметен телефон.
Најдоброто решение за сопствениците е да го стават автомобилот во Sleep Mode. Во моментов, повеќето возачи претпочитаат Stand By Mode, бидејќи на тој начин автомобилот се поврзува со апликацијата.