Турција и претседателот Реџеп Тајип Ердоган донесоа одлука за прием на Финска во НАТО, која официјално ќе биде објавена во петок за време на посетата на финскиот претседател, беше соопштено денеска во Хелсинки.
„Турците се надеваа дека ќе бидам таму да го слушнам нивниот одговор кога ќе ја соопштат својата одлука. Секако, ја прифатив поканата и ќе одам да ги добијам нивните искажани намери“, се вели во соопштението на финскиот претседател Саули Ниинисто.
Турскиот претседател, кој во моментов води кампања за реизбор, од минатата година го блокира пристапот на Финска и Шведска во НАТО алијансата, а веќе денеска пред пладне посочи дека позитивно ќе одговори на ветувањето дадено во Хелсинки дека земјата ќе влезе во НАТО.
„Ќе го направиме нашиот дел, ќе го испочитуваме ветувањето што го дадовме. В петок ќе се сретнеме со претседателот и ќе го направиме она што го бара нашето ветување“, рече Ердоган.
Финска и Шведска заеднички аплицираа за влез во НАТО во мај 2022 година.
Нивниот влез сè уште не е ратификуван од Унгарија и Турција, кои ги обвинуваат двете земји, особено Шведска, дека се „премногу благи“ кон дисидентските групи кои Анкара ги смета за терористички.
Зеленото светло на Турција го отвора патот на Финска да влезе во НАТО, бидејќи се очекува ратификација на Унгарија.
